29 ނޮވެމްބަރ 2021 - 15:00
ޕްރިޓޯރިއާ (ނޮވެމްބަރު 29) - ކޮވިޑުގެ އާ ވޭރިއަންޓް އޮމިކްރޮން ޖެހިފައިވާ ބަލި މީހުންގެ ފަރާތުން ފެންނަނީ ވަރަށް އާދައިގެ އަލާމާތްތައް ކަމަށް އެ ވޭރިއަންޓް ހޯދި ސައުތު އެފްރިކާގެ ޑޮކްޓަރު ވިދާޅުވެއްޖެ އެވެ.
ސައުތު އެފްރިކާގެ މެޑިކަލް އެސޯސިއޭޝަންގެ ޗެއާ އެންޖެލިކު ކޮއެޓްޒީ ވިދާޅުވީ އޮމިކްރޮން ޖެހިފައިވާ ބައެއް މީހުން ހޮސްޕިޓަލްގައި އެޑްމިޓްކުރަން ޖެހޭ ހިސާބަށް ނުގޮސް ބަލިން ރަނގަޅުވެފައިވާ ކަމަށެވެ.
ޕްރިޓޯރިއާގައި މަސައްކަތް ކުރައްވާ ޑޮކްޓަރު ވިދާޅުވީ އާ ވޭރިއަންޓުގެ ބަލި މީހުންގެ ފަރާތުން ފެންނަ އެންމެ އާދަޔާޚިލާފު ކަމަކީ މާބޮޑަށް ވަރުބަލިވުން ކަމަށާއި ނަމަވެސް ޒުވާނުންގެ ކިބައިން އެކަން ފެންނަ މިންވަރު މަދު ކަމަށެވެ.
"އޮމިކްރޮން އަށް ޕޮޒިޓިވް މީހުންގެ ފަރާތުން ފެނުނު އަލާމަތްތަކުގެ ތެރޭގައި ކޮންމެ ވެސް ވަރަކަށް ގައިގައި ރިއްސާ ކަމަށް ފާހަގަވި. ކަރުގައި ރިއްސުމާއި ހިކިކޮށް ކެއްސުން ވެސް ހިމެނޭ. ވަރަށް މަދު މީހެއްގެ ހުންގަދަވެފައި ވަނީ،" ޑޮކްޓަރު ވިދާޅުވި އެވެ.
ކޮވިޑުގެ އެހެން ވޭރިއަންޓްތަކުން މިއަށް ވުރެ މާބޮޑު އަލާމާތްތައް ފެނިފައިވެ އެވެ.
ޑޮކްޓަރު ވިދާޅުވީ ޑެލްޓާ ވޭރިއަންޓަށް ފިޓްނުވާ ބާވަތެއް ކަމަށް ޝައްކު ކުރެވިގެން ދެކުނު އެފްރިކާގެ ސިއްހީ އޮފިޝަލުންގެ ސަމާލު ކަމަށް އެކަން އެންމެ ފުރަތަމަ ގެނައީ މި މަހު 18 ވަނަ ދުވަހު ކަމަށެވެ. އޭގެ ފަހުން ސައުތު އެފްރިކާގެ ސައެންޓިސްޓުން އެ ވޭރިއަންޓަށް B.1.1.529 ގެ ނަންދީ އެކަން އިއުލާން ކުރީ މި މަހު 25 ވަނަ ދުވަހު ކަމަށެވެ. އަދި އެ ވޭރިއަންޓަށް އޮމިކްރޮންގެ ނަން ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ދީފައި ވަނީ މިދިޔަ ހުކުރު ދުވަހު އެވެ.
ޑޮކްޓަރު ވިދާޅުވީ އޮމިކްރޮންގެ ބަލި މީހުންގެ ވެސް ބޮޑުވަރު ވެދާނެ ކަމަށާއި އެކަމަކު މިހާތަނަށް ފާހަގަވި ކަމަކީ ވެކްސިން ނުޖަހާ މީހުންނަށް ވެސް އެ ވޭރިއަންޓުން މާބޮޑު އަލާމާތްތަކެއް ނުފެންނަ ކަމަށެވެ.
ރަސްމީ ހިސާބުތައް ދައްކާ ގޮތުން ސައުތު އެފްރިކާ އިން ދާދި ފަހުން ފެނުނު ކޮވިޑް ކޭސްތަކުގެ ހަތަރުބައިކުޅަ ތިން ބަޔަކީ އޮމިކްރޮންގެ ބަލި މީހުންނެވެ. ސައުތު އެފްރިކާ އިން ފެނުނު ވޭރިއަންޓް މިހާރު ވަނީ ވަރަށް ގިނަ ގައުމުތަކުން ވެސް ފެނިފަ އެވެ. އޮމިކްރޮންގެ އެންމެ ބޮޑަށް ފާހަގަވި ކަމަކީ އެ ވޭރިއަންޓުގެ މިއުޓޭޝަންތައް ގިނަވުމެވެ. ނަތީޖާއެއްގެ ގޮތުން ބަލި ފެތުރޭ މިންވަރަށް އަވަހެވެ.
ސައުތު އެފްރިކާ އިން އޮމިކްރޮން ފެނުމާ ގުޅިގެން އެ ގައުމުން ދަތުރުކުރާ މީހުންނަށް ވަރަށް ގިނަ ގައުމުތަކުގެ ބޯޑަރު ވަނީ ބަންދުކޮށްފަ އެވެ.