27 ނޮވެމްބަރ 2021 - 16:24
އއ. ތޮއްޑޫގައި ބީއެމްއެލްގެ އަހަރެންގެ ބޭންކް ކޮމިއުނިޓީ ފަންޑުން، ފޮތް ކިޔާ ޕާކެއް ހުޅުވައިފި އެވެ.
ތޮއްޑޫ ބަނދަރު ސަރަހައްދުގައި ހުޅުވި މި ޕާކަކީ އެ ރަށު ސްކޫލުގެ ލީޑިން ޓީޗަރެއް ކަމަށްވާ އާދަމް އަފްސަލް އިސް ނަންގަވައިގެން ތަރައްގީކުރި ޕާކެކެވެ. މިއީ އެ ރަށުގެ ކުޑަކުދިންނާއި ބޮޑެތި މީހުން ފޮތް ކިޔުމަށް ޝައުގުވެރިކަން އުފެއްދުމަށް ހުޅުވި ޕާކެކެވެ.
މި ޕާކުގައި ދަރިވަރުންނަށް ހާއްސަ މިނީ ލައިބްރަރީއެއް ހުރެ އެވެ. އަދި ޕާކުގައި މީހުން ވަގުތު ހޭދަކޮށްލުމަށް އުނދޯއްޔާއި ޖޯލި ވެސް ވަނީ ބަހައްޓައިފަ އެވެ.
މީގެ އިތުރުން ކުޑަކުދިންގެ "މޮޓޯ ސްކިލް" ތަރައްގީ ކުރުމަށް ރާޒުވާ އާއި ޑޮމިނޯ ފަދަ ކުޅިވަރުތައް ކުޅެވެން ހުންނައިރު ކުދިންގެ މައުލޫމާތު މުއްސަނދި ކުރުމަށް ތަފާތު މައުލޫމާތު ހިމެނޭ ބޯޑުތައް ވެސް ވަނީ މި ޕާކުގައި ބަހައްޓާފަ އެވެ. މި ޕާކު ހަދާފައިވަނީ ބަގީޗާއެއްގެ ގޮތަށެވެ.
މި ޕްރޮޖެކްޓު ކާމިޔާބުކުރި އާދަމް އަފްސަލް ވިދާޅުވީ އެ ޕާކުގެ ސަބަބުން އެ ރަށު ސްކޫލުގެ ދަރިވަރުންނަށް ރައްޓެހިންނާ އެކު ގޮސް ފިލާވަޅުތައް ދަސްކޮށް ފޮތް ކިޔުމަށް ޝައުގުވެރިކަން އިތުރުކުރެވޭނެ ކަމަށެވެ. އަދި މިއީ އެ ރަށަށް ވަރަށް މުހިންމު ޕްރޮޖެކްޓެއް ކަމަށް ވެސް އޭނާ ވިދާޅުވި އެވެ.
"މި ރަށުގައި ކުޑަކދުިންގެ ޕާކެއް އަދި އިތުރު ލައިބްރަރީއެއް ވެސް ނެތް. އެހެންވެ، ކުދިން ފޮތް ކިއުމަށް ޝައުގުވެރިކަން އުފެއްދުމުގެ ގޮތުން އައި ހިޔާލެއް މިއީ،" އާދަމް ވިދާޅުވި އެވެ.
ބީއެމްއެލް ކޮމިއުނިޓީ ފަންޑުން ކޮންމެ ކުއާޓާއެއްގައި ފަސް ރަށެއްގައި ޕްރޮޖެކްޓުތައް ހިންގަން އެހީވެ އެވެ. އެ ފަންޑަށް ހުށަހަޅާ ޕްރޮޕޯސަލްތަކުގެ ތެރެއިން ހޮވާލެވޭ ޕްރޮޖެކްޓުތައް ހިންގަން މާލީ އެހީތެރިކަން ފޯރުކޮށްދެ އެވެ.
ކޮމިއުނިޓީ ފަންޑަށް ހުށަހަޅާ ޕްރޮޕޯސަލްތަކަކީ ތައުލީމާއި ކުޅިވަރާއި ހިލޭ ސާބަހަށް ކުރާ މަސައްކަތްތަކުގެ ޕްރޮޕޯސަލްތަކެކެވެ. މިފަދަ 55 ޕްރޮޖެކްޓަކަށް މިހާތަނަަށް ބޭންކުން ވަނީ އެހީވެފަ އެވެ.