26 ނޮވެމްބަރ 2021 - 18:15
ސެންޓާރާ ހޮޓެލްސް އެންޑް ރިޒޯޓްސްގެ އާ ރިސޯޓު ހެދުމަށް ބޭނުންވާ ތިން ރަށް ހިއްކުމުގެ މަސައްކަތް އެމްޓީސީސީން ނިންމާލައިފި އެވެ.
އެ ކުންފުނިން މިދިޔަ ބުދަ ދުވަހު މި މަސައްކަތް ނިންމާލައި ރަށްތައް ވަނީ ސެންޓާރާއާ ހަވާލުކޮށްފަ އެވެ.
މި މަޝްރޫއުގެ މަސައްކަތް ނިންމައި ހަވާލު ކުރަން ބޭއްވި ރަސްމިއްޔާތުގައި ޕްލޭނިން މިނިސްޓަރު އަހުމަދު އަސްލަމާއި އެމްޓީސީސީގެ ސީއީއޯ އާދަމް އާޒިމާއި ސެންޓާރާ ގްރޭންޑް އައިލެންޑް އެންޑް ސެންޓާރާ ރަސްފުށީގެ އޭރިއާ ޖެނެރަލް މެނޭޖަރު ޕްރަޕައިޖިޓް ތޮންގްމާ ބައިވެރިވެވަޑައިގެންނެވި އެވެ.
މި މަޝްރޫއުގެ ދަށުން މާލެ އަތޮޅު ވައްޓަރުފަޅު ފަރުގައި އޮންނަ ތިން އާޓިފިޝަލް ރަށެއްގެ ބިން ވަނީ ހިއްކައިފަ އެވެ. މިއިން ކޮންމެ ރަށެއްގައި ހަތް ހެކްޓަރުގެ ސަރަހައްދެއް އޮންނާނެ ކަމަށް އެމްޓީސީސީން ބުންޏެވެ.
ސެންޓާރާއިން ތިން ރަށެއް ހިއްކައިގެން ތަރައްގީކުރާ ރިސޯޓުގެ ބިން ހިއްކުމުގެ މަސައްކަތް ލެގޫންސް އެސެޓްސް ޕްރައިވެޓް ލިމިޓެޑުން އެމްޓީސީސީއާ ހަވާލުކުރީ އޮކްޓޯބަރު، 8، 2019ގަ އެވެ. އެ ކުންފުނިން އެމްޓީސީސީއާ މި މަސައްކަތް ހަވާލު ކުރީ 26.29 މިލިއަން ޑޮލަރު (ގާތްގަނޑަކަށް 405މިލިއަން ރުފިޔާ) އަށެވެ.
މިއީ، އެމްޓީސީސީގެ 40 އަހަރުގެ ތާރީހުގައި ވެސް ބައިނަލްއަގުވާމީ ކުންފުންޏަކަށް ފުރިހަމަކޮށްދިން އެންމެ ބޮޑު މަޝްރޫއެވެ.
ސެންޓާރާއިން އަންނަނީ މިހާރު ވެސް ރާއްޖޭގައި ދެ ރިސޯޓު ހިންގަމުންނެވެ. އެއީ ސެންޓާރާ ރަސްފުއްޓާއި ސެންޓާރާ ގްރޭންޑެވެ.
ވައްޓަރުފަޅު ފަރުގައި ތަރައްގީ ކުރާ މި ރިސޯޓަކީ ސެންޓާރާއިން ރާއްޖޭގައި ހަދާނެ އެންމެ ބޮޑު ރިސޯޓެވެ.