21 ނޮވެމްބަރ 2021 - 18:57
ރާއްޖެއިން އިންޑިއާއާ އެކު ހެދި އެއްބަސްވުންތަކުގައި އެއްވެސް ގޯހެއް ނެތް ކަމަށް ރައްޔިތުންގެ މަަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީ (241 ކޮމިޓީ)ގެ މެމްބަރުންގެ އަގުލަބިއްޔަތުން މިއަދު ފާސްކޮށްފި އެވެ.
އިންޑިއާއާ އެކު ގާއިމުކުރި ތިން އެއްބަސްވުމެއް ދިރާސާކުރުމަށް މަޑުއްވަރީ ދާއިރާގެ މެންބަރު އަދި ޕީއެންސީގެ ނައިބު ރައީސް އާދަމް ޝަރީފު ހުށެހެޅުއްވި މައްސަލަ ދިރާސާކޮށް، ކޮމިޓީން ފާސްކުރި ރިޕޯޓްގައި ބުނީ އެއްބަސްވުންތަކުގައި އެއްވެސް ގޯހެއް ނެތް ކަމަށެވެ.
ރައީސް ޔަމީންގެ ސަރުކާރުގައި ޑިފެންސް މިނިސްޓަރުކަން ވެސް ކުރެއްވި އާދަމް ޝަރީފް ހުށަހެޅުއްވި މައްސަލައާ ގުޅިގެން 241 ކޮމިޓީން ދިރާސާކުރީ އުތުރު ތިލަފަޅު (ޔޫޓީއެފް) ގައި ސިފައިންގެ ޑޮކްޔާޑަކާއި ބަނދަރެއް ހަދަން އިންޑިއާއާ އެކު ސޮއިކުރި އެއްބަސްވުމާއި 2016 ވަނަ އަހަރު އެކުލަވާލި، ޑިފެންސް ކޯޕަރޭޝަން އެއްބަސްވުމާއި ރާއްޖޭގެ ހައިޑްރޯގްރާފީ ދިރާސާކުރަން އިންޑިއާ އެކު ހެދި އެއްބަސްވުމެވެ.
ކޮމިޓީން އެއްބަސްވުންތައް ދިރާސާކުރި އިރު ޑިފެންސް މިނިސްޓަރު މާރިޔާ އަހުމަދު ދީދީ އާއި ޗީފް އޮފް ޑިފެންސް ފޯސް މޭޖާ ޖެނެރަލް އަބްދުﷲ ޝަމާލް ކޮމިޓީގެ ބައްދަލުވުމަކަށް ވަޑައިގެން އެއްބަސްވުންތަކުގެ މައުލޫމާތު ދެއްވި އެވެ. އަދި ކޮމިޓީން އެދުމުން މާރިޔާ ވަނީ އެ އެއްބަސްވުންތައް ކޮމިޓީގެ މެމްބަރުންނަށް ދައްކަވައިފަ އެވެ. އެހެން ނަމަވެސް އެއީ ސިއްރު އެއްބަސްވުންތަކަށް ވާތީ ކޮޕީއެއް ނުދެއްވަ އެވެ.
އެމްޑީޕީގެ މެޖޯރިޓީ އޮންނަ 241 ކޮމިޓީގެ މިއަދުގެ ބައްދަލުވުމުގައި ބައިވެރިވެވަޑައިގެންނެވި މެމްބަރުންގެ ތެރެއިން ހަތް މެމްބަރުންގެ އަގުލަބިއްޔަތުން އެ ތިން އެއްބަސްވުމުގައި ވެސް ގޯހެއް ނެތް ކަމަށް ނިންމިއިރު އިދިކޮޅު ފަރާތްތަކުން އަންނަނީ އިންޑިއާއާ އެކު ހެދި އެއްބަސްވުންތައް ހަދާފައި ވަނީ ރާއްޖޭގެ ސިޔާދަތާއި މިނިވަންކަން ގެއްލޭ ފަދަ މާއްދާތަކެއް އޭގައި ހިމަނައިގެން ކަމަށް ތަކުރާރުކޮށް ބުނަމުންނެވެ. އެކަމަކު މި ތުހުމަތުތައް ސަރުކާރުން ދޮގު ކުރެ އެވެ.