20 ނޮވެމްބަރ 2021 - 07:35
ޗައިނާގެ ބުފޭ ރެސްޓޯރަންޓަކަށް ދާ މީހަކު މާ ގިނައިން ކާތީ އެތަނަށް ގެއްލުންވާ ކަމަށް ބުނެ އެތަނަށް އޭނާ ވަނުން މަނާކޮށްފި އެވެ.
މީޑިއާތަކުން ރިޕޯޓްކޮށްފައިވާ ގޮތުގައި ޗަންޗްޝާ ސިޓީގެ ހަންޑާޑީ ސީފުޑް ބާބެކިއު ބުފޭ ރެސްޓޯރަންޓަށް ވަނުން މަނާކުރީ ކެންގް ކިޔާ ޒުވާން ފިރިހެނެކެވެ. ކެއުމަށް ވަރަށް ފޯރި ހުންނަ އަދި ކާ މަންޒަރު ލައިވް-ސްޓްރީމްކޮށް ވެސް އުޅޭ އެ މީހާ މާ ގިނައިން ކާތީ ރެސްޓޯރަންޓަށް ވަނުން މަނާކުރުމާ ގުޅިގެން ހުނާން ޓީވީ އަށް ބުނީ މާ ގައިން ކެޔަސް އޭނާ އަކީ ކާ އެއްޗެހި އިސްރާފުކުރާ މީހެއް ނޫން ކަމަށެވެ.
"އަހަންނަކީ ވަރަށް ގިނައިން ކާ މީހެއް. އެއީ މައްސަލައެއްތަ؟" ކެންގް މީޑިއާ އަށް ބުންޏެވެ.
ހަންޑާޑީ ސީފުޑް ބާބެކިއު ބުފޭ ރެސްޓޯރަންޓުން ބުނީ އޭނާ ދެން އެ ރެސްޓޯރަންޓަށް ވަނުން މަނާކުރީ އަތުގައި ފައިސާ ނެތް ވަރަށް ކައި، އޭގެ ގެއްލުން ރެސްޓޯރަންޓަށްވުމުގެ އިތުރަށް ބުފޭ އަށް އަރުވާ ގިނަ އެއްޗެހި ކެންގް އެކަނި ކާލާތީ އެވެ.
އެ ރެސްޓޯރަންޓަށް އޭނާ ދިޔަ ފުރަތަމަ ފަހަރު 1.5 ކިލޯގެ ތަކެތި އެކަނިމާ އެކަނި ކާލި އެވެ. އަދި އެހެން ފަހަރެއްގައި 3.5 ތަކެތި ކާލައި އޭގެ ފަހުން އަނެއްކާ އެހެން ދުވަހެއްގައި ބުފޭ އަށް އެރުވި ޕްރޯންސްގެ ތެރެއިން 4 ކިލޯ އެކަނި ކާލި އެވެ.
މިކަން ބޮޑުވެގެން ކެންގް ރެސްޓޯރަންޓަށް ވަނުން މަނާކޮށް އެތަނުގެ ވެރިޔާ ބުނީ އޭނާގެ ސަބަބުން ތަނަށް ގެއްލުންވަމުންދާ ކަމަށެވެ.
"ބުފޭ އަށް އަރުވާ ކާތަކެތީގެ ޓްރޭތައް އޭނަ އެކަނި ކާލުމުގެ މައްސަލަ މިހާރު ވަރަށް ބޮޑުވެއްޖެ. ސޯއި މިލްކް ބޯ އިރު ވެސް އެބަ ބޯލާ ވިއްސަކަށް ތިރީހަކަށް ފުޅި." ވެރިމީހާ ބުންޏެވެ.
މާ ގިނައިން ކާތީ ރެސްޓޯރަންޓަށް ކެންގް ވަނުން މަނާކުރި ވާހަކަ ވަރަށް ބޮޑަށް ސޯޝަލް މީޑިއާގައި ދައުރުވެ، އާންމުންގެ ސަމާލުކަން ވެސް އެ ވާހަކަ އަށް ލިބިފައިވެ އެވެ.