18 ނޮވެމްބަރ 2021 - 06:05
ސްރީ ލަންކާގެ ލަވަކިޔުންތެރިޔާ ޔޮހާނީ ދިލޯކާ ޑި ސިލްވާ ކަވާކޮށްގެން އާންމުކުރި ލަވަ "މަނިކެ މަގޭ ހިތޭ" އެތައް ވާޝަނެއް މިހާރު ވެސް ނެރެފައިވެ އެވެ. އެ ލަވައިގެ ޖާދޫގައި މުޅި ދުނިޔެ ވެސް ޖެހުނޭ ބުނުމަކީ ދޮގަކަށް ނުވާނެ އެވެ. މި ފަހަރު "މަނިކެ މަގޭ ހިތޭ" ގެ އަރަބި ވާޝަނެކެވެ.
މި މަހުގެ 10 ގައި "އެކްތިފައިތު" ގެ ނަން ދީފައިވާ ލަވައަށް އެހުންތެރިންގެ ވަރަށް ބޮޑު ތަރުހީބެއް އަންނަނީ ލިބެމުންނެވެ. މި ލަވަ ކިޔާފައިވަނީ ލުބާނާންގެ ފަންނާނު މަރްވާ ހަލީލެވެ. ލަވައިގައި އެކުލެވޭ ރެޕް ކަޑިތައް ކިޔާފައިވަނީ ރެޕް އާޓިސްޓެއް ކަމަށްވާ އަތައްލާއެވެ.
ޔޮހާނީގެ ލަވައެކޭ އެއްގޮތަށް "މަނިކެ މެގޭ ހިތޭ" ގެ އަރަބި ވާޝަނަކީ ވެސް ހަމަ އެ ފީލްގައި ކިޔާފައިވާ އަަޑު އަހައިލަން ފަސޭހަ ލަވައެކެވެ. މަރްވާ އަތައްލާގެ ލަވަ ވެސް ނެރެފައިވަނީ އެ މީހުންގެ މަންޒަރުތައް ފެންނަ ވީޑިއޯއަކާ އެކީގަ އެވެ. ޔޫޓިއުބްގައި މި ލަވަ ބޮޑު ތަރުހީބެއް ލިބެމުން އަންނައިރު، ވަރަށް ގިނަ ބަޔަކު އަރަބި ވާޝަން ވެސް ވަރަށް ޗާލު ކަމަަށް ބުނެފައިވެ އެވެ.
މިދިޔަ އަހަރުގެ ލޮކްޑައުންގެ ތެރޭގައި ޔޮހާނީގެ އަޑުން ރެކޯޑްކުރި ލަވައިގެ މަގުބޫލުކަން އެއް ދުވަހުން އަނެއް ދުވަހަށް ބޮޑުވަމުން އަންނަ އިރު، މީގެ ދުވަސްކޮޅެއް ކުރިން "މަނިކޭ މަހޭ ހިތޭ" ގެ ޑަޗް (ނެދަލެންޑްސް) ގެ ވާޝަނެއް ވެސް ނެރެފައިވެ އެވެ. އެ ލަވަ ކިޔާފައީ އެ ގައުމުގެ ފަންނާނެއް ކަމަށްވާ އެމާ ހީޒްޓާޒް އެވެ.
"މަނިކެ މަގޭ ހިތޭ" އަކީ އަސްލު ލަންކާގެ ލަވަކިޔުންތެރިޔާ ސަތީޝަން ރަތަނަޔަކަ ކީ ލަވައެކެވެ. އެ ސިންގަޅަ ލަވައިގެ ޅެން ހެދީ ދުކަން އާރްއެކްސް އެވެ. ލަވައިގެ ޕްރޮޑިއުސަރު ޗަމަތު ސަންގީތު، ޔޮހާނީ ލައްވައި އެ ކަވަކުރުވީ އޭނާ ފިއާނޯ ކުޅެމުން ފޯނުން ލަވަކިޔާތަން ރެކޯޑްކޮށް އާންމުކުރުމުންނެވެ.
ޔޮހާނީގެ ކަވަ "މަނިކެ މަގޭ ހިތޭ" މަޝްހޫރުވެގެން ދިޔައީ އޭގެ ފަހުންނެވެ. މި ލަވައިގެ ސަބަބުން އޭނާ އަށް ލިބުނު މަޝްހޫރުކަމާއި މަގުބޫލުކަމާ އެކު އޭގެ ހިންދީ ވާޝަނެއް ބޮލީވުޑްގެ ފިލްމެއްގައި ވެސް ހިމަނަން މިހާރު އޮތީ ނިންމައިފަ އެވެ. އެއީ ޑައިރެކްޓަރު އިންދަރު ކުމާރުގެ "ތޭންކް ގޯޑް" ގަ އެވެ.